• Դուք ՀՀ քաղաքացի եք կամ հանդիսանում եք ՀՀ ռեզիդենտ² և

   

• Ունեք բանկային հաշիվ «Էյչ-Էս-Բի-Սի Բանկ Հայաստան» ՓԲԸ -ում (այսուհետ` Բանկ) և առնվազն 3 ամիս աշխատում եք Բանկում սպասարկվող պատշաճ բանկային պատմություն ունեցող ընկերությունում, և Ձեր ամսական զուտ աշխատավարձը կազմում է նվազագույնը 200,000 ՀՀ դրամ կամ

   

• Ունեք բանկային հաշիվ Բանկում և առնվազն 3 ամիս աշխատում եք ընկերությունում,որն ունի հաշիվ(ներ) ՀՀ այլ բանկերում, և Ձեր ամսական զուտ աշխատավարձը կազմում է նվազագույնը 200,000 ՀՀ դրամ: Ընդ որում Ձեր աշխատավարձը պետք է փոխանցվի Բանկում սպասարկվող Ձեր հաշվին վարկի տրամադրումից հետո (եթե աշխատավարձի փոխանցումը չի պահանջվում Բանկի կողմից մինչև վարկի տրամադրումը)³ կամ
• Ունեք բանկային հաշիվ որևէ այլ բանկում, անընդմեջ աշխատում եք առնվազն 3 ամիս և Ձեր աշխատավարձը վերջին 3 ամսվա ընթացքում փոխանցվել է Ձեր հաշվին, և Ձեր ամսական զուտ աշխատավարձը կազմում է նվազագույնը 250,000 ՀՀ դրամ

• Դուք ՀՀ քաղաքացի եք կամ հանդիսանում եք ՀՀ ռեզիդենտ² և
• Ունեք առնվազն 3 ամսվա բանկային պատշաճ պատմություն Բանկում, և Ձեր հաշիվների վերջին 3 ամիսների միջին ամսական մնացորդը, ինչպես նաև վերջին ամսվա միջին մնացորդը կազմում է նվազագույնը 200,000 ՀՀ դրամ կամ 500 ԱՄՆ դոլար (կամ համարժեքը այլ արժույթով) կամ
• Ունեք առնվազն 3 ամսվա բանկային պատշաճ պատմություն ՀՀ տարածքում գործող որևէ այլ բանկում, և Ձեր հաշիվների վերջին 3 ամիսների միջին ամսական մնացորդը, ինչպես նաև վերջին ամսվա միջին մնացորդը կազմում է նվազագույնը 250,000 ՀՀ դրամ (կամ համարժեքը այլ արժույթով)

Ձեր վարկի գումարը կարող է տատանվել 5 միլիոն ՀՀ դրամից մինչև 200 միլիոն ՀՀ դրամ:

Վարկի առավելագույն գումարը կազմում է Երևանում կամ հարակից արվարձաններում ձեռքբերվող գույքի արժեքի 90%-ը։ Համապատասխանաբար՝ հաճախորդի կողմից տրամադրվող նվազագույն կանխավճարի չափը կազմում է 10%:

Վարկառուի բոլոր վարկերի գծով վճարումների հարաբերակցությունը զուտ ամսական եկամտին չի կարող գերազանցել 60%-ը, եթե զուտ ամսական եկամուտը 700,000 ՀՀ դրամից քիչ է, և 70%-ը, եթե զուտ ամսական եկամուտը 700,000 ՀՀ դրամ է և ավելի:

Վարկը տրամադրվում է ՀՀ դրամով

Վարկը տրամադրվում է անկանխիկ և փոխանցվում է հաճախորդի բանկային հաշվին։ Այնուհետև գումարը փոխանցվում է բացառապես վաճառողի հաշվին։

Անշարժ գույքը գրավադրվում է Բանկի օգտին` մինչև վարկի ամբողջական մարումը:

Անշարժ գույքի ձեռքբերման վարկի դեպքում Հաճախորդը՝ այսուհետ նաև վարկառու, գրավադրվող գույքի նկատմամբ պետք է ունենա սեփականության իրավունք:

Եթե վարկը տրամադրվում է առաջնային շուկայից գնվող անշարժ գույքի ձեռքբերման համար, և այն կառուցման փուլում է գտնվում (այսինքն դեռևս բացակայում է սեփականության իրավունքի պետական գրանցման վկայականը), որպես վարկի ապահովում պետք է գրավադրվի որևէ այլ բնակելի անշարժ գույք:

 Սեփականության իրավունքի պետական գրանցման վկայականի տրամադրումից հետո ձեռքբերված անշարժ գույքը պետք է գրավադրվի Բանկի օգտին` գրավադրված այլ գույքի փոխարեն: Անշարժ գույքի ձեռքբերման փաստաթղթերը (առուվաճառքի պայմանագիր, սեփականության իրավունքի պետական գրանցման վկայական և այլն) պետք է հնարավորինս շուտ տրամադրվեն Բանկին գրավադրման գործընթացը սկսելու նպատակով (ձեռքբերված անշարժ գույքն առավելագույնը 12-րդ ամսվա ավարտին պետք է գրավադրված լինի Բանկի օգտին):

Գրավադրված անշարժ գույքը պետք է ապահովագրվի` օգտվելով Բանկի կողմից ընդունելի ապահովագրական ընկերությունների ծառայություններից:

Ըստ հաճախորդի որոշման ապահովագրության համար  հիմք է ընդունվում գույքի շուկայական արժեքը կամ վարկի գումարը։

Գույքի արժեքի մի մասի չափով ապահովագրության դեպքում ապահովագրական հատուցումը կվճարվի ապահովագրական գումարի և գույքի ամբողջական շուկայական արժեքի հարաբերակցության համամասնությամբ:

Ապահովագրական պոլիսը պետք է վերակնքվի յուրաքանչյուր տարի վարկային պայմանագրի գործողության ողջ ընթացքում: Եթե վարկառուն չի ապահովում գույքի ապահովագրումը, ապա Բանկն ինքնուրույն կիրականացնի ապահովագրությունը` վարկառուի հաշվին:

Ապահովագրական հատուցման շահառուն վարկառուն է:

Գրավի պայմանագրով նախատեսված գրավի առարկայի ապահովագրության պայմանները խախտելու դեպքում Բանկն իրավունք ունի պահանջել վարկի վաղաժամկետ մարում:

Ապահովագրության վճարի վերաբերյալ տեղեկատվությունը կարող եք գտնել Վարկավորման հետ կապված վճարներ  ենթաբաժնում։

 Վարկը տրամադրվում է 24-ից 300 ամսով

Վարկը կարող է մարվել հետևյալ եղանակներից որևէ մեկով.

Տարբերակ 1 (նվազող մնացորդով) - վարկի հիմնական գումարը մարվում է հավասար ամսական վճարումներով, իսկ ամսական տոկոսագումարները նվազում են ժամանակի ընթացքում՝ հիմնական գումարի նվազմանը զուգընթաց: Այսպիսով, վարկի մարման ողջ ժամանակահատվածում Ձեր ընդհանուր ամսական վճարումները նվազում են:

Տարբերակ 2 (անուիտետային) - վճարման ենթակա գումարները հաշվարկվում են հավասարաչափ ամսական վճարումների սկզբունքով: Այս դեպքում վարկի մարման ողջ ժամանակահատվածի ընթացքում վարկի գծով ամսական ընդհանուր վճարումների մեծությունը մնում է անփոփոխ, սակայն դրանում ներառվող վարկի մայր գումարի գծով վճարումների և ամսական տոկոսագումարների հարաբերակցությունը կարող է փոփոխվել։
 

Եթե վարկատուի նկատմամբ ունեք չմարված պարտավորություն, ապա Ձեր կողմից պարտավորությունները կատարելու դեպքում մարումները իրականացվում են հետևյալ հերթականությամբ.

1. Տուժանք
2. Տոկոսագումարներ
3. Մայր գումար

Վարկի տոկոսագումարը հաշվարկվում է վարկի արժույթով վարկի մնացորդի նկատմամբ օրական կտրվածքով` տարին ընդունելով 365 oր կամ 366 օր՝ նահանջ տարվա դեպքում:

Վարկառուի կողմից տոկոսագումարների և վարկի գումարների մարումները ժամանակին չկատարելու դեպքում այդ մասին տեղեկատվությունը կտրամադրվի ՀՀ կենտրոնական բանկի վարկային ռեգիստր և ԱՔՌԱ Քրեդիտ Ռեփորթինգ ՓԲԸ՝ պարտավորության ժամկետանց դառնալու օրվանից 3 աշխատանքային օրվա ընթացքում, որը բացասական ազդեցություն կունենա վարկառուի վարկային պատմության վրա և կարող է խոչընդոտ հանդիսանալ ապագայում մեկ այլ վարկի դիմելիս։ Առկայության դեպքում կիրառելի է նաև համավարկառուների և երաշխավորների նկատմամբ:

Դուք իրավունք ունեք ԱՔՌԱ վարկային բյուրոից տարեկան մեկ անգամ անվճար ձեռք բերել Ձեր վարկային պատմությունը:

Վարկային պարտավորությունները վարկային պայմանագրով սահմանված կարգով չկատարելու կամ ոչ պատշաճ կատարելու կամ վճարումը պարբերաբար ուշացնելու դեպքում Ձեր գույքը կարող է բռնագանձվել և Դուք կարող եք զրկվել դրա նկատմամբ Ձեր իրավունքներից:

Վարկառուի վարկային պարտավորությունները մարելու համար գրավի իացումից ստացված գումարը բավարար չլինելու դեպքում արտավորությունները կարող են մարվել Վարկառուի այլ գույքի հաշվին, ՀՀ օրենսդրությամբ սահմանված կարգով:

Վարկի վաղաժամկետ մարման տույժեր և տուգանքներ չեն կիրառվում:

Վարկի վաղաժամկետ մարումները հնարավոր է կատարել հետևյալ եղանակներից մեկով. 

Տարբերակ 1. Համամասնորեն նվազեցնելով ամսական մարումների չափը՝ վարկի մարման ժամկետը թողնելով անփոփոխ:

Տարբերակ 2. Կրճատելով վարկի մարման ժամկետը՝ ամսական վճարումների չափը թողնելով անփոփոխ:

ՈՒՇԱԴՐՈՒԹՅՈՒՆ

Վարկի վաղաժամկետ մարում կատարելու դեպքում Բանկի կողմից համամասնորեն նվազեցվում է կրեդիտավորման ընդհանուր ծախսը՝ վճարման ենթակա տոկոսագումարները և Բանկի կողմից գանձվող այլ վճարները (առկայության դեպքում) համամասնորեն վերադարձնելով Հաճախորդին:

Վարկի մայր գումարի կամ տոկոսագումարների վճարումներն ուշացնելու դեպքում ուշացված գումարի նկատմամբ կկիրառվի տարեկան 5% տուգանային տոկոսադրույք` ի հավելումն վարկի անվանական տոկոսադրույքի:

Երաշխավորություն տրամադրելիս երաշխավորը պետք է գիտակցի երաշխավորության տրամադրման հետևանքները, այդ թվում՝ պարտապանի կողմից իր պարտավորությունը չկատարելու դեպքում պարտավորության, տույժերի ու տուգանքների ամբողջական կատարումը երաշխավորի կողմից, վարկառուի կողմից իր պարտավորությունը չկատարելու դեպքում երաշխավորի վարկային պատմության վատանալը, ընդհուպ մինչև երաշխավորի գույքից զրկվելը:

Բանկը պարտավոր է․

• Տրամադրել վարկային, երաշխավորության պայմանագրերի և մարման գրաֆիկի օրինակ,
• Հաղորդակցումը իրականացնել Ձեր կողմից ընտրված եղանակով,
• 7 օր առաջ ծանուցել պայմանագրի պայմանների փոփոխության մասին,
• 1 օր առաջ հիշեցնել առկա պարտավորության վերաբերյալ,
• Վարկի մարման ուշացման դեպքում՝ ամենաուշը 1 օր հետո Ձեզ տեղեկացնել այդ մասին:

Դուք իրավունք ունեք․

• Ցանկացած ժամանակ Բանկից պահանջել տեղեկատվություն վարկի մնացորդի չափի մասին,
• Վարկառուից հետ ստանալու Ձեր կողմից վարկի համար վճարած գումարները, ինչպես նաև վարկառուի փոխարեն կրած այլ վնասները:

Հաճախորդների վարկային հաշիվների համար Բանկը վերջիններիս տրամադրում է համապատասխան քաղվածքներ՝ ՀՀ օրենսդրությամբ սահմանված կարգով և ժամկետներում: Այդ քաղվածքները կարող են առաքվել Ձեր փոստային հասցեին կամ ուղարկվել էլ. փոստով: Քաղվածքների, դրանց կրկնօրինակների և այլ տեղեկությունների տրամադրման պայմանների, ժամկետների և սակագների վերաբերյալ տեղեկություններին կարող եք ծանոթանալ Ծառայությունների սակագներ և Հիմնական պայմաններ հղումներով:

ՆԱԽՔԱՆ ՎԱՐԿԱՅԻՆ ՊԱՅՄԱՆԱԳՐԻ ԿՆՔՈՒՄԸ ՏՐԱՄԱԴՐՎՈՒՄ Է ՎԱՐԿԻ ԷԱԿԱՆ ՊԱՅՄԱՆՆԵՐԻ ԱՆՀԱՏԱԿԱՆ ԹԵՐԹԻԿ՝ ՀԱՄԱՁԱՅՆ ՀՀ ԿԵՆՏՐՈՆԱԿԱՆ ԲԱՆԿԻ «ՖԻՆԱՆՍԱԿԱՆ ԿԱԶՄԱԿԵՐՊՈՒԹՅՈՒՆՆԵՐԻ ԳՈՐԾԱՐԱՐ ՎԱՐՎԵԼԱԿԵՐՊԻ ԿԱՆՈՆՆԵՐԸ» ԿԱՆՈՆԱԿԱՐԳ 8/05-Ի:

Մինչև կրեդիտավորման պայմանագրի կնքումը Դուք հնարավորություն ունեք ծանոթանալու կրեդիտի էական պայմաններին և, ցանկության դեպքում, համեմատելու այլ կրեդիտավորողների կողմից առաջարկվող կրեդիտի էական պայմանների հետ։

Էական պայմանների անհատական թերթիկով սահմանվում է տվյալ կրեդիտի գծով հաճախորդի համար կիրառելի՝ կրեդիտի էական պայմանները, սակագները, սպառողի իրավունքն ու պարտավորությունները և ժամանակին չկատարելու դեպքում բացասական հետևանքները:

Անհատական թերթիկը ներառում է, բայց չի սահմանափակվում հետևյալ տեղեկատվությամբ՝ 

• Կրեդիտի տեսակը
• Կրեդիտի գումարը
• Կրեդիտի արժույթը
• Կրեդիտի տրամադրման ժամկետը
• Կրեդիտի անվանական տարեկան տոկոսադրույքը
• Կրեդիտի տարեկան փաստացի տոկոսադրույքը
• Կրեդիտի հետ կապված վճարները
• Մարումների հաճախականությունը
• Կանխավճարը
• Վարկը և տոկոսագումարները չվճարելու դեպքում կիրառվող տույժերն ու տուգանքները

Եթե սպառողի պարտավորությունների կատարումն ապահովված է գրավով և (կամ) երաշխավորությամբ, ապա ապահովվածության մասում ներկայացվում է.

• Գրավի տեսակը
• Նշում երաշխավորի մասին
• Եվ այլ պայմաններ

Ցանկանում ենք տեղեկացնել նաև, որ անհատական թերթիկի և կրեդիտավորման, հիպոտեկային կրեդիտավորման պայմանագրերի միջև հնարավոր է տարբերություններ լինեն` պայմանավորված մարման ժամանակացույցի և (կամ) փոխարժեքի փոփոխությամբ:

Անհատական թերթիկի պայմանները գործում են կրեդիտային հայտի դրական որոշման վերաբերյալ  Ձեզ, որպես սպառող (երաշխավոր), տեղեկացնելուց հետո 10 աշխատանքային օր: Այն դեպքում, երբ սպառողը (երաշխավորը) ցանկանում է անմիջապես ստորագրել Անհատական թերթիկը, ապա Բանկը բավարար ժամանակ է ընձեռում սպառողին (երաշխավորին), որպեսզի մանրամասն կարդա Անհատական թերթիկը: Եթե սպառողը ստորագրված թերթիկը Բանկին ներկայացնում է սահմանված ժամկետից ուշ, ապա Բանկն իր ներքին իրավական ակտերի համաձայն ինքն է որոշում ընդունել թերթիկը և կնքել կրեդիտավորման, հիպոտեկային կրեդիտավորման պայմանագիրը այդ պայմաններով, թե ոչ:

1.1. Բանկը վարկ տրամադրելու որոշումը կայացնում է իր հայեցողությամբ` հաշվի առնելով վարկային հայտի համապատասխանությունը տվյալ վարկատեսակի հայտարարված պայմաններին, ինչպես նաև գնահատելով այնպիսի էական հանգամանքներ, ինչպիսիք են հաճախորդի վարկարժանությունը, ժամկետանց պարտավորությունների առկայությունը և այլ հանգամանքներ:

1.1.1. Բանկն իր հայեցողությամբ կարող է պահանջել, որպեսզի Հաճախորդի պարտավորությունը ապահովված լինի երաշխավորությամբ՝ կախված ռիսկայնության գնահատման արդյունքներից:

2.1. Վարկային հայտի վերաբերյալ վերջնական որոշման կայացման և Հաճախորդին որոշման մասին տեղեկացնելու ժամկետը և կարգը՝ Բանկի կողմից պահանջված բոլոր անհրաժեշտ փաստաթղթերը ներկայացնելուց հետո մինչև 5 աշխատանքային օրվա ընթացքում, Հաճախորդի նախընտրած եղանակով։

2.2. Վարկը վարկառուին տրամադրելու ժամկետը` վարկային պայմանագիրը ստորագրելուց և վարկային պայմանագրով սահմանված վճարումները կատարելուց հետո 2 աշխատանքային օրվա ընթացքում:

3.1. Վարկի հաստատման չափանիշները 

• փաստաթղթավորված կայուն եկամուտ, որը համապատասխանում է տվյալ վարկատեսակի տրամադրման նվազագույն պահանջներին
• դրական վարկային պատմություն, ըստ որի վերջին 12 ամիսների ընթացքում հաճախորդի բոլոր վարկերի գծով ուշացումների քանակը չպետք է գերազանցի Բանկի կողմից սահմանված առավելագույն շեմը
• վարկային գործընթացի համար անհրաժեշտ լիարժեք փաստաթղթերի փաթեթ

3.2. Վարկի մերժման չափանիշներ

• վարկը մարելու համար անբավարար կամ չփաստաթղթավորված եկամուտներ
• վարկի ոչ նպատակային օգտագործման վերաբերյալ տեղեկատվություն
• հաճախորդի կողմից ոչ արժանահավատ կամ ոչ լիարժեք տվյալների տրամադրում
• բացասական վարկային պատմություն, ըստ որի վերջին 12 ամիսների ընթացքում հաճախորդի բոլոր վարկերի գծով ուշացումների քանակը գերազանցում է Բանկի կողմից սահմանված առավելագույն շեմը
• հաճախորդի տարիքը չի համապատասխանում տվյալ վարկատեսակի տրամադրման համար Բանկի կողմից սահմանված չափանիշին

Դուք իրավունք ունեք առանց որևէ պատճառաբանության միակողմանիորեն լուծելու կրեդիտավորման պայմանագիրը դրա կնքմանը հաջորդող 7 աշխատանքային օրվա ընթացքում։